सार्वजनिक नवरात्रौत्सव- 2021 करीता मार्गदर्शक सूचना निर्गमित - guidelines for the Navratrotsav washim district

सार्वजनिक नवरात्रौत्सव- 2021 करीता मार्गदर्शक सूचना निर्गमित

वाशिम (www.jantaparishad.com) दि. 05 (जिमाका) : राज्यात कोविड-19 च्या संसर्गजन्य परिस्थीतीचा विचार करता शासनामार्फत विविध प्रतिबंधात्मक उपाययोजना करण्यात येत आहे. 14 मार्च 2020 पासून साथरोग प्रतिबंधक अधिनियम 1897 ची अधिसूचना जारी करण्यात आली आहे. 17 एप्रिल 2020 च्या आदेशान्वये एकत्रित सुधारीत मार्गदर्शक सूचना निर्गमित करुन आवश्यक ती कार्यवाही करण्यासाठी जिल्हाधिकारी यांना सक्षम प्राधिकारी म्हणून घोषीत करण्यात आले आहे.

यावर्षी 7 ते 15 ऑक्टोबर 2021 दरम्यान नवरात्र/दुर्गापुजा/दसरा हे सण साजरे करण्यात येणार आहे. कोरोनाची दुसरी लाट ओसरली असली तरी अजूनही कोरोनाचा धोका कायम आहे. त्यामुळे नागरीकांनी मोठया प्रमाणात एकत्र येऊन गर्दी करुन उत्सव साजरे करणे योग्य ठरणार नाही. नवरात्रौत्सव साजरा करतांना नागरीकांनी आरोग्याच्या दृष्टीकोणातून योग्य ते खबरदारी घेणे आवश्यक आहे. जिल्हयात कोरोना विषाणूचा प्रार्दुभाव रोखण्यासाठी प्रतिबंधात्मक उपाययोजना करण्यात येत आहे. या उपाययोजनेचा एक भाग म्हणून साथरोग अधिनियम 1897 नुसार जिल्हादंडाधिकारी तथा जिल्हा आपत्ती व्यवस्थापन प्राधिकरणचे अध्यक्ष षन्मुगराजन एस. यांनी वाशिम जिल्हयातील सार्वजनिक नवरात्रौत्सव 2021 च्या अनुषंगाने पुढील आदेश पारीत केले आहे.

कोविड-19 च्या संसर्गजन्य परिस्थीतीचा विचार करता 4 जून 2021, 11 ऑगस्ट 2021 तसेच 24 सप्टेंबर 2021 च्या आदेशान्वये ब्रेक द चेन अंतर्गत दिलेल्या सुधारीत मार्गदर्शक सुचनांचे तंतोतंत पालन करणे आवश्यक आहे. सार्वजनिक नवरात्रौत्सव उत्सवासाठी मंडळांनी नगरपालीका/नगरपंचायत/स्थानिक पंचायत यांची त्यांच्या धोरणानुसार पुर्वपरवानगी घेणे आवश्यक आहे. कोविड-19 मुळे उदभवलेल्या संसर्गजन्य परिस्थतीचा विचार करता आणि नगरपालिका/नगरपंचायत तसेच संबंधित स्थानिक प्रशासनाचे मंडपाबाबतचे धोरण याच्याशी सुसंगत असे मर्यादित स्वरुपाचे मंडप उभारण्यात यावे.

यावर्षीचा नवरात्र उत्सव साध्या पध्दतीने साजरा करण्याच्या दृष्टीने घरगुती तसेच सार्वजनिक देवीच्या मुर्तीची सजावट त्याअनुषंगाने करण्यात यावी. देवीच्या मुर्तीची उंची सार्वजनिक मंडळाकरीता 4 फुट घरगुती देवीच्या मुर्तीची उंची 2 फुटाच्या मर्यादेत असावी. शक्यतो देवीच्या मुर्तीऐवजी घरातील धातु/संगमरवर आदी मुर्तीचे पुजन करावे. मुर्ती शाडूची/पर्यावरणपुरक असल्यास शक्यतो विसर्जन घरीच करावे. विसर्जन घरी करणे शक्य नसल्यास कृत्रिम विसर्जनस्थळी विसर्जन करण्यासाठी स्थानिक प्रशासनाशी समन्वय साधावा. नवरात्रौत्सवाकरीता देणगी/वर्गणी स्वेच्छेने दिल्यास त्याचा स्विकार करावा. जाहिरातीच्या प्रदर्शनामुळे गर्दी आकर्षित होणार नाही याची दक्षता घ्यावी. आरोग्यविषयक व सामाजिक संदेश असलेल्या जाहिराती प्रदर्शित करण्यास पसंती देण्यात यावी. माझे कुटूंब माझी जबाबदारी या मोहिमेची देखील जनजागृती करण्यात यावी.

गरबा/दांडिया व इतर सांस्कृतिक कार्यक्रम आयोजित करु नये. त्याऐवजी आरोग्यविषयक उपक्रमे/ शिबीरे उदा. रक्तदान यास प्राधान्य देण्यात यावे. कोरोना, मलेरिया, डेंग्यू इत्यादी आजार आणि त्याचे प्रतिबंधात्मक उपाययोजना व स्वच्छतेबाबत जनजागृती करण्यात यावी. देवीच्या दर्शनाची सुविधा ऑनलाईन, केबल नेटवर्क, वेबसाईट व फेसबुक इत्यादीव्दारे उपलब्ध करुन देण्याबाबत जास्तीत जास्त व्यवस्था करण्यात यावी. देवीच्या मंडपामध्ये प्रत्यक्ष येऊन दर्शन घेणाऱ्या भाविकांच्या बाबतीत ब्रेक द चेन अंतर्गत दिलेल्या सुधारीत मार्गदर्शक सुचनांचे काटेकोरपणे पालन करण्यात यावे. आरती, भजन, किर्तन व अन्य धार्मिक कार्यक्रम आयोजित करतांना गर्दी होणार नाही, तसेच ध्वनी प्रदुषणाबाबतीत असलेल्या नियमाचे व तरतुदींचे पालन करण्यात यावे.

मंडपात एकाचवेळी पाचपेक्षा जास्त कार्यकर्त्यांची उपस्थिती नसावी. मंडपात खाद्यपदार्थ व पेयपानाची व्यवस्था करण्यास सक्त मनाई आहे. देवीच्या आगमन व विसर्जनाच्या मिरवणूका काढू नये, विसर्जनाच्या पारंपरीक पध्दतीने विसर्जनस्थळी होणारी आरती घरीच करुन विसर्जनस्थळी कमीत कमी वेळ थांबावे. लहान मुले आणि वरिष्ठ नागरीकांनी सुरक्षेच्यादृष्टीने विसर्जनस्थळी जाणे टाळावे. संपूर्ण चाळीतील/ इमारतीमधीन सर्व घरगुती देवींच्या मुर्तींच्या विसर्जनाची मिरवणूक एकत्र काढण्यात येवू नये. नगरपालिका,नगरपंचायत, विविध मंडळे, गृहनिर्माण संस्था, लोकप्रतिनिधी, स्वयंसेवी संस्था इत्यादीच्या मदतीने कृत्रिम तलावांची निर्मिती करण्यात यावी. नागरीकांची गर्दी टाळण्यासाठी स्थानिक प्रशासनाने प्रभात समितीनिहाय मुर्ती स्विकृती केंद्राची व्यवस्था करावी. याबाबतची जास्तीत जास्त प्रसिध्दी दयावी.

विसर्जनाच्या तारखेस जर घरगुती तसेच सार्वजनिक नवरात्रोत्सव मंडळाचा परिसर प्रतिबंधित क्षेत्रात असेल तर मुर्तीचे विसर्जन सार्वजनिक ठिकाणी करण्यास मनाई राहील. दसऱ्याच्या दिवशी रावण दहनाचा कार्यक्रम सर्व नियम पाळून करावा. यावेळी आवश्यक तेवढयाच किमान व्यक्ती कार्यक्रमस्थळी हजर राहतील. तसेच फेसबुकच्या माध्यमातून थेट प्रसारण करण्याची व्यवस्था करण्यात यावी. कोविड-19 चा प्रादुर्भाव रोखण्यासाठी शासनाच्या विविध विभागाने विहीत केलेल्या नियमांचे पालन करणे बंधनकारक राहील. प्रत्यक्ष सण सुरु होण्याच्या मधल्या कालावधीत स्थानिक प्रशासनाकडून आणखी काही सुचना प्रसिध्द झाल्यास त्याचे सुध्दा पालन करण्यात यावे. आदेशाचे पालन न करणाऱ्या कोणतीही व्यक्ती अथवा समुह हा आपत्ती व्यवस्थापन अधिनियम आणि कलम 188 अन्वये शिक्षेस पात्र असलेला अपराध केला असे मानण्यात येईल असे या आदेशात नमूद केले आहे.