कामगार, कर्मचाऱ्यांना संपूर्ण वेतन, भत्ते देण्याचे आदेश

कामगार, कर्मचाऱ्यांना संपूर्ण वेतन, भत्ते देण्याचे आदेश

वाशिम, दि. ०३ (जनता परिषद, जिमाका द्वारा साभार) : कोरोना विषाणूचा प्रादुर्भाव रोखण्यासाठी करण्यात आलेल्या लॉकडाऊनमुळे उद्योग, व्यवसायातील तसेच अन्य दुकाने व इतर आस्थापना बंद आहेत. या आस्थापनांच्या कर्मचारी, कामगारांना बंद काळातील संपूर्ण वेतन व भत्ते देण्याचे आदेश राज्य आपत्ती व्यवस्थापन प्राधिकरणने दिले आहेत.

सर्व खासगी आस्थापना, कारखाने, कंपन्या, दुकाने (अत्यावश्यक सेवा आस्थापना वगळून) इत्यादी आस्थापनांचे जे कंत्राटी, बाह्यस्त्रोताद्वारे उपलब्ध करून घेण्यात आलेले कर्मचारी व कामगार, तात्पुरत्या कालावधीसाठीचे कर्मचारी व कामगार, रोजंदारीवरील कामगार कोरोना विषाणूच्या प्रादुर्भावामुळे करण्यात येणाऱ्या उपाययोजनांमुळे घरी अथवा स्थानबद्ध आहेत, अशा सर्व कामगार व कर्मचाऱ्यांना ते कर्तव्यावर होते, असे समजून त्यांना बंद काळातील संपूर्ण वेतन व भत्ते देण्याचे आदेश महाराष्ट्र राज्य आपत्ती व्यवस्थापन प्राधिकरणच्या राज्य कार्यकारणीचे अध्यक्ष तथा मुख्य सचिव यांनी ३१ मार्च २०२० दिले आहेत. त्यानुसार जिल्ह्यातील सर्व निमशासकीय, औद्योगिक, वाणिज्यिक, व्यापारी व दुकाने आस्थापांना हे आदेश लागू राहतील. त्यांनी शासनाच्या आदेशाचे काटेकोर पालन होईल, याची दक्षता घ्यावी, असे आवाहन सरकारी कामगार अधिकारी गौ. र. नालींदे यांनी प्रसिद्धी पत्रकाद्वारे केले आहे.