कारंजा येथील आस्थापनेवर कारवाई; एका बालकामगाराची मुक्तता child labour freed at karanja

कारंजा येथील आस्थापनेवर कारवाई; एका बालकामगाराची मुक्तता

वाशिम, दि. ०९ : बालकामगार व किशोरवयीन कामगार (प्रतिबंध व नियमन) अधिनियम १९८६ सुधारणा २०१६ अंतर्गत कृती दलाने ७ जुलै २०२१ रोजी कारंजा येथील एका आस्थापनेवर धाड टाकून येथे काम करीत असलेल्या एका बालकामगाराची मुक्तता केल्याची माहिती सरकारी कामगार अधिकारी गौरवकुमार नालिंदे यांनी दिली.

बालकामगार या अनिष्ठ प्रथेचे उच्चाटन करण्यासाठी ७ जुलै रोजी कारंजा येथे धाडसत्र घेण्यात आले. तपासणी दरम्यान दारव्हा रोड परिसरातील घोटकर ऑटोमोबाईल्स या आस्थापनेत एक बालकामगार काम करीत असल्याचे आढळून आल्याने कृती दलाने सदर बालकामगारास मुक्त करून, संबंधित आस्थापनाधारक विक्की रामदास घोटकर विरुद्ध कारंजा शहर पोलीस स्टेशनमध्ये गुन्हा दाखल केला आहे.

धाडसत्र यशस्वी करण्यासाठी सरकारी कामगार अधिकारी गौरवकुमार नालिंदे, दुकाने निरीक्षक विनोद जोशी, उप शिक्षणाधिकारी श्री. देशमुख, चाईल्ड लाईनचे समन्वयक महेश राऊत, पोलीस कॉन्स्टेबल श्री. गाडवे, श्रीमती किरण तेलगोटे यांनी कार्यवाही केली.

बालकामगार व किशोरवयीन कामगार (प्रतिबंध व नियमन) अधिनियम, १९८६ सुधारणा २०१६ अंतर्गत कोणत्याही आस्थापनेत बालकामगार सहभाग असल्यास, त्याबाबत कोणताही नागरिक, पोलीस अधिकारी किंवा सरकारी कामगार अधिकारी तक्रार नोंदवू शकतो. सदर कायद्याचे उल्लंघन केल्यास काम करून घेणाऱ्याविरुद्ध कलम १४ अन्वये दंडात्मक कारवाई करण्यात येते. तरी बालकामगार या अनिष्ठ प्रथेचे समूळ उच्चाटन करण्यासाठी नागरिकांनी सहकार्य करावे व कोणीही बालकामगार कामावर ठेवू नये, असे आवाहन सरकारी कामगार अधिकारी श्री. नालिंदे यांनी केले आहे.